العودة   منتدى صيادين مصر > الصيد وانواعه والرحلات > الصيد البحري والنهري
 

 
 
إضافة رد
 
أدوات الموضوع انواع عرض الموضوع
 
قديم منذ /04-21-2012, 05:56 PM   #1

محمد حسام
مشرف

محمد حسام غير متواجد حالياً

 رقم العضوية : 221
 تاريخ التسجيل : Feb 2012
 المكان : مصر
 المشاركات : 828
 النقاط : محمد حسام is on a distinguished road
 تقييم المستوى : 16
 قوة التقييم : 13

Thanks: 590
Thanked 777 Times in 496 Posts
افتراضي موسوعة شاملة عن انواع الطعوم لصيد الاسماك في النيل وطرق صناعتها

 

الطعم " الدود" - العجينه – الريم – الغله – الفواكه – الخضروات – المصارين - الحشرات

وسنتناول كل شيء على حدة من حيث:
التعريف و انواع السمك الاكله لهذا الطعم - اوقات الصيد به - اماكن الصيد - طرق الصيد به - انواعه – طرق تزفير الدور - طريقه حفظة - طرق تربيته او تحضيرة

(1) الطعم " الدود "

التعريف :
يعيش دود الارض على حواف الانهار ( والترع - والرشاح ) وفى الاماكن الرطبه ويكثر اثناء انخفاض المياه .
ويوجد فى الاراضى الزراعيه التى تكثر من الرى على بعد حوالي 70 سم من سطح التربه.

انواع السمك :

يعشق السمك بجميع انواعه الدود دون تمييز .

اوقات الصيد :
افضل وقت بالليل وبلا منازع
و غالباً مش هايشتغل معاك الصبح بمعنى انك مش هاتطلع الا شر بلطى وعبودى

اماكن الصيد :
حبذا لو مكان فيه حجارة بس يكون بقالها فترة طويلة مرمية فى الماية
او بالقرب من الحشائش والخوص
او في وسط المياة ( حداف )

طرق الصيد به :

شعر 40 على المكنه ورمل ب 30 او 35
واعمل وش طويل يفضل 1.5 متر ودة حسب العمق يعنى لو ما فيش عمق قلل الوش
وسن (6 او 7)
وطعم الطعماية صاحية افضل و تكون مدلدله من السن للحركه واغراء السمك
وممكن تستخدم احدي الطرق في تركيب الدودة فى السن:
• العنكبوت : تركيب دودتين على السن
• الكفته : تدكيك فحل الطعم فى السن

وممكن تشتغل بطريقتين
حداف:
عن طريق وضع الرصاصة المناسبه لشدة الطيار لانها لو صغيرة هتتجرف فى القاع ويقع منها الطعم بسرعه ويفضل ان تكون تقيله 150 جرام او اكثر وتحدف وتتوكل على الله في ناس بتفكر انك لما بترمي بعيد ده يبأى احسن دي معلومه غلط لان السمك ممكن يكون تحتيك على طول وانت بتدور عليه بعيد المهم تحدف وبعد ما الحداف يسقط فى المية ويستقر تلم الخيط على المكنه بحيث يكون مشدود وتعرف دة من ان اللبلوب يكون متني تنيه بسيطه وانتظر هزة اللبلوب واضرب او اشكم السمكه وبعد كدة تلم والرازق هو الله
فلة :
عن طريق غماز وسط ورصاصة توزنه بس مايكنش على الشعرة عشان السمك هايغمز كتير ويشد ويسيب ويلعب بالطعم
واحسن حاجه انك تسرح الفله عن طريق عمل الخرزه واستخدم غماز كبير غماز تسريح وكام رصاصة توزنه " تابع موضوع عايز تصتاد من على اى ارتفاع من النيل " ولو غمزت لا تستعجل عليها بل اسحب منها الطعم بهدوء واتركه مره اخرى وعاود الكره ولكن بهدوء شديد ولكن فى النهايه تشد منك بقوه فاضرب عليها .
لو ما طلعتش شد وظبط طعمك وارمي تانى.
وما تنساش الفسفور

انواعه :

دود ارض بلدى: وهو يستخرج من الاراضى الزراعية التى تستخدم السماد العضوي وبيكون لونه احمر ومتوفر بمحلات الصيد
النطاط: وهو يستخرج من حدائق الفاكهة خاصة الموز وهو كثير الحركة " بيتنطط " ومتماسك ولا يعيش خارج التربه الخاصة به لونه اسود من فوق واحمر من تحت وفية خط بعد راسة
الطعم الافرنجى : يستخرج من حواف الترع والمصارف وهوه كبير الحجم ويلقب بالطعم الزفر لانه ذو رائحه نفاذه
الدود الاسمعيلاوي: الدود الإسماعيلاوي قد يصل طولها إلى متر و نصف و يقوم البائع بتقطيعها إلى عشرة أو أكثر قطعة حسب طولها ليقسمها على أكبر عدد من الطرود بعد أن يضعها في قطعة خيش في حجم طابع البريد و يلفها في ورق الجرائد ليقلل من المصروفات و يكثر من الربحية
الدود القراص: هي الدودة الي لها أرجل كثيرة وطول الدودة من 7 إلى 10
دود مشرشر: الدود المشرشر يباع في اكياس بلاستيك مملوءة بماء البحر لتظل حية
السبلة : ودة هنتكلم عنه لوحدها بس امسك بطنك اثناء القراءة

طريقه حفظة :
دة بالنسبه للبلدي
اكثر مدة هيعشها 10 ايام
يمكن المحافظه على الدود بتنظيفه من الطين والعوالق ووضعه فى جريده ولفه جيداً وبعدها قطعه قماش مبلوله ويلف ويوضع فى كيس وبعدها فى درج الثلاجه فى اقل مكان تبريد وهو درج الثلاجه ويكشف عليه كل ثلاثه ايام . واحترس لانه ممكن يسرح فى الثلاجة فاحكم عليه كويس

وهناك طريقة اخري بانك تجيب حتة خيش من عند المنجد الى بيحط فيه القطن وتبلها خفيف وتحط الطعم فيها بعد التأكد من ان الطعم لا يوجد به من هو تالف وتحطها فى كوز صاج وتسيبه مفتوح وتشيله فى مكان بة رطوبة يعنى مثلا على سيراميك ومكان ظل و تبقى تشأر
عليه ببخة ميه على الخيشه كل كام يوم

اما لو طعم نطاط تجيب طينة من نفس المكان بتاع الطعم وتحط الطعم فيها
وتجيب جردل بلاستيك او صفيحة المهم اى حاجة وتخرمها من تحت اخرام صغيرة اوى
وتملأ نصفها طينة وتضع الطعم على وش الطينة الطعماية اللى هتموت مش هتنزل فى الطين
ودى يا ترميها او تصطاد بيها وخلى الطينة دائما طرية (رطبة) تقوم بالرش بقليل من الماء ومتكترش المية
عشان ممكن الطينة تعفنة وتخلية فى مكان بعيد عن الشمس او الحرارة ولو حطيتة فى التلاجة هيموت

طرق تربيته:
الكلام بالنسبه للدود البلدي
الطريقه الاولي
اولاً وعاء التربيه من الخشب تكون ابعاد وعاء التربية على الاقل 65 سم طول * 65 سم عرض * 35 سم ارتفاع
قم بثقب الوعاء من الاسفل والجوانب بانتظام بابعاد منتظمة كل 1/2 سم
مع تغطية الجوانب بخيش حتى لا تخرج الديدان وكذلك السقف
واحتفظ به بعيداً عن الشمس وفى مكان رطب جيد التهويه
عمل الفرشة عن طريق خلط مواد عضوية مثل قش الرز – التبن – اوراق الاشجار الجافه – ثم تنقع فى المياة لمدة يوم كامل
ثم قطع ورق جرائد الى شرائح وورق كرتون وانقعها فى الميه ويخلط مع الفرشة
قم بملء الوعاء حتى نصف ارتفاعة
قم بإضافه الطينه واخلطها قليلاً
قم بإضافة المياة الى الفرشه بس ما تزودش بحيث انها ما تعجنش يعنى تكون رطبه
ثم اضف 1/2 كيلو دود او اقل
قم بإضافة الغذاء من بواقى اكل بشرط ان لا تحتوي على " سمن – زيت – منتجات البان "
والغذاء المفضل هو قشر البيض المسلوق
بعد 6 الى 8 اسابيع ستنخفض كمية الفرشة وتمتلء بمخلفات الديدان
يتم تغيير الفرشة كل 6 شهور

الطريقة الثانية
عن طريق فرم أش الارز وجعله شبيه بالتراب ونحطه مثلا في ( طشط كبير ) من الالومنوم أو أي مادة ونضع الاش المفروم ونجيب شوية طعم (دود ) ونضعهم فيه ونرش كل يوم شوية مية باردين شوية ونحطه في مكان رطب أو بارد شوية بحث الشمس متشفشي الدود
والاش المفروم منه عملنا التربة ومنه يأكل وبعد أسبوعين ستجد ما يسرك

الطريقه الثالثه
المستلزمات
1-مستطيل خشبي بابعاد متر ونص في متر مقفول من الواجهه بسلك حديدي فتحتاه صغيره جدا ده عند اي نجار مش هيكلفك حتي 10 جنيه
2-التربه 3/4 طمي+1/4 رمل
3- متر مربع نجيله صناعيه
4-سبله واوراق شجر صفراء
5-وقطعه خيش لتغطيه المربع من الخارج
طريقه التنفيذ
1نضع المربع الخشبي اتجاه السلك للاسفل
2-نضع التربه ونخلطها جيدا مع قليل من السبله
3-ونحضر كمله الدود المطلوبه تقريبا ربع كيلو
4- نقوم بتنديه التربه بقليل من الماء ونرش قطعه الخيش ماء باردوة
5- ثم نقوم بوضع الدود علي التربه وفرزه جيدا من الدود المقطوع والميت
6نقوم بتثبيت النجيله ووضع اوراق الاشجار عليها
ونضعه في مكان ضل ويستحسن يكون فيه تيار هوا مستمر
مع مراعاه الحفاظ علي الخيشه دائما رطبه وبارده والتربه باستمرار بهاء ماء ومرويه وليست غرقانه

الطريقة الرابعه
- قم بشراء باسكت بلاستيك (جردل) وقم بعمل ثقوب صغيرة جداً في الأسفل عن طريق ابرة كبيرة الحجم او مسمار صغير بتسخينه عاى النار.
2- قم بملئ الجردل بورق الجرائد المقطع على شكل شرائح بعرض 1 سم .
3- قم بترطيب الورق برشة ببخاخة ماء .
4- قم بقسمة الورق إلى نصفين ضع نصف في أسفل الباسكت .
5- قم بشراء نصف كيلو من الدود مع الحرص أن يكون مظهره الصحي جيد (يعني دودة صاحية بتلعب) وضعه فوق الورق المفروش .
6- أضف نصف الورق الباقي فوق الدود .
7- أضف بقايا طعام من المطبخ (أي طعام) وتجنب الطعام المحتوي على زيوت أو سمن .
8- ضع باقي كمية الورق فوق الطعام .
9- قم بتغطية الباسكت بغطاء بلاستيك مثقوب .
9- قم بوضع الجردل في مكان مظلم رطب .
بعد شهر قم بحصد أول كمية من الدود بالطريقة التالية :
1-قم بمنع الأكل لمدة ثلاثة أيام .
2- في اليوم الرابع ضع كمية من الأكل .
3- انتظر لمدة ساعتين ثم قم برفع نصف الورق على مفرش بلاستيك .
4- قم بالتقاط الدود ثم أعد الورق إلى مكانه وهكذا كلما رغبت في الحصول على كمية أخرى .

(2) دود السبلة

التعريف :
دود ابيض صغير و هو عباره عن يرقات وهو بيستعمل كتير جدا في اوروبا وفي الارياف بس قليل

اماكن تواجدة :
يوجد في روث الماشية او اي مكان فيه قمامه و بقايا اكل مرميه لفتره ولعياذ بالله

الاسماك الاكله له :
هو مغرى للبلطى اكتر من دود الرض لأنه دائم الحركه خاصة الاحجام الكبيرة

وقت الصيد :
في اي وقت

طريقه الحصول عليه :
اولا يوضع الروث على فرشه فى الشمس و يقلب حتى يجف قليلا
ثم تضع ال حصيله الجافه فى شىء كبير و تقف فى مكان به بعض الرياح
وتبدا من اعلى تدلق الحصيله فى الهواى
سيتطاير القش و خلافه و يسقط الدود الابيض الرفيع على الفرش الاخر فى الارض اسفل يدك مباشره
تعاد الكره مرتين اوتلاته للتنقيه

طريقه الصيد به :
الصيد بالسبله طعم دودتان عن طريق تعليقهم بالسن من منتصف الدودة وترك الطرفين حرين
يستخدم سن 8 او 9 و تنزل على غماز خفيف فوق الدور المتزفر من نفس الدودة

طريقة التربية :
الطريقه الاولي:
لو عندك مكان مهجور زي سطح او بلكونه مقفوله و يكون فيه شمس لفتره من النهار جمع بقايا اكل و سيبه لمده من 5 ايام لاسبوع و ابقي رش عليها بخه مياه كل يومين لو الدنيا حر اوي
قشر البطيخ بالذات بيتجمع عليه اكبر كميه من الدود مش عارف ليه يمكن علشان الرطوبه و السوائل اللي فيه
الطريقه الثانية:
بتجيب رغيف عيش تخمره في الميه وبعدين تعصره وبعد كده تحطه في كيس اسود لزوم الظلام وتحط عليه قطعة صغيرة من الخميرة مقدار
ملعقة شاي واضف ملعقة سكر واخلط المكونات جيدا
اقفل عليها الكيس وسيبها يومين الي 4 ايام لحد ماتلاقي الدود ملا الكيس
الطريقه الثالثه :
تــبــــن اللى هوا عيدان قمح مكسرة - حبوب القمح - حبوب زرة عويجة -
خميرة مش جافة (طرية او لينة ) - عيش غير صالح للاكل (معفن) لامؤخذة - كيس من البلاستيك
الطريقة
نضيف جميع المكونات المذكورة اعلا ة بكميات مناسبة داخل الكيس البلاستيك ونضيف عليهم مياة بكمية مناسبة ونقفل الكيس لمدة 15 يوم وخلال هذة الايام نرش على الكيس من الخارج مياء با البخاخة او رزاز
ويوضع فى مكان رطب وليس سا خنا عن طريق التعفن الفطر ها يتحول لديدان

علي فكره الدود اللي بيتواجد في المش ده هو نفس نوع الدود

الديدان دي لها استخدامات طبيه برضه علشان محدش يقرف منها دي بتستخدم في الجروح الملوثه و لو اتحطت علي اي جرح سبحان الله بتاكل الانسجه الميته و تترك الانسجه الحيه و بعد كام يوم تلقي الجرح نظيف زي الفل وهي مازالت تستخدم لحد الان في الغرض ده في انجلترا و اسمها بالانجليزي maggots

ويوجد منها صناعى نفس الشكل والليونه وطرفها الخارج عن السن يتحرك مع حركه المياه كانها طبيعيه وممكن يترش عليها اسبراى رائحه للزفر وغالبا عند الصيد بيها لابد وان تزفر بيها الاول يعنى ترمى شويه فى الدور .......... ولكن الحاجات دى لا تباع هنا .

(3) الغله

التعريف:
القمح البلدي ويستحن من النوع ذو الحبه الكبيره وان يكون كامل ( يعنى بقشرة )
مش بتاع البليلة لان القمح بدون قشرة لا يصلح ابدا

انواع السمك :
البلطي

اوقات الصيد :
من اول الظهر اشتغل بالغلة وطبعا لازم يكون دور غلة والسمك متعود عليها وتزفر قبل ما ترمى بوقت كافى
الغله ليها صيد بالليل بس يكون فى مكان ضارب فيه كشافات نور لان السمك بيجي عليها عن طريق الرؤيه مش الريحه ودي بتكون ضعيفة
وافضل شهور الصيد 5/6/7/8/9

اماكن الصيد :
من على الشاطيء ولازم يكون الدور ميتة هادية يعنى مش حامية يعنى الغله عايزه دور مياة ضحله الى حد ما يعنى الاقضل ان تكون ترعه صغيره
والارضيه طينيه ومافيش حجارة عشان تسهيل الرؤيه للسمك او وسط ورد النيل
والجميل ان تكون ادوار الغله اللى بيتغسل فيها غله زى ترعه الجيزاويه و بحر يوسف و بعض الترع الصغيرة و طبعا ده فى و قت غسيل الغله
يعنى بعد الحصاد بالتحديد فى اخر الصيف يعنى اغسطس و سبتمبر
ويفضل الدور ان يكون مافيهوش عمق وده علي فكرة مثالي في الغة


تجهيز الدور:
اولاً تجهيز الدور عن طريق عمل أكثر من مراية يعني أعمل خمس مرايات والتنقل بينهم طول اليوم والدور الى يشتغل معاك ماتسبوش
ولعمل المرايه عن طريق رش كبشتين من الغلة علي ارضية الدور بحيث تكون نصفها في الماء والنصف الاخر علي البر على مسطح طين " ارضيه طينيه " على حرف المياة وبنظفر في دايرة كبيرة 5 متر اثناء التجهيز
وعند انتهاء التجهيز وبدء الصيد صغر دايرة الظفر تحت رجلك 4 او 5 حبات
والمرايه تعنى مياه صافيه جدا علشان السمك هياكل على الشوف مش الشم

ولو المياة مش رايقة دور على ليخة (نبات مائي) او ورد النيل و قم بتنظيفه من المنتصف بحيث تكون ارضيته مكشوفه و لما الماية تروق قم برش الغلة لتحضير الدور
ملحوظة
" الغلة المستخدمة للتزفير نص سوا " علشان السمكة ما يعرفش ياكلها ويدخل على الحباية المستويه على السن"
وممكن تزفر بعلف اسماك او علف دواجن زفر ينقع في الماء لمدة ساعةحتي يشرب الماء يتم خلطه ببعض الدقيق وبعض الردة تكور منه كور صغيرة تلقي بها في الماء وتضع بعضه في كيس تصنعه من الشكاير المنسوجة للارز او الدقيق وتربطه وتلقي به في الماء امامك ومن وقت لاخر تهز الكيس فينتشر مابه في الماء

ولتجهيز دور دائم للغله نتبع ما يلي :
ويكون ذلك بمتابعته والقاء بعض القمح به كل يوم لمدة ويفضل فى الميعاد
المفضل لك ان تصطاد فية بعد ذلك لكي يتعود السمك على الاكل في هذا التوقيت
وعلي فكرة هذا الاعداد وان بدا للبعض عمل ممل الا انه ممكن يخللي لك الدور شغال طول الموسم لان السمكة بتتعود علي اكل الغلة

لو كان سكنك بعيد عن الدور
تشترى 2 كيلو قمح
تستبعد نصف كيلو فى كيس
ترفع الباقى على النار
بعد 10 دقائق انشل ثلث الكمية التى على النار
وضعها فى الكيس السابق
بعد5 دقائق اخرى انشل الثلث الثانى من على النار
وضيفة الى الكيس السابق
بعد 5 دقائق اخرى انشل باقى الغلة من على النار
وضفهم الى نفس الكيس
ثم القى بكل الكمية فى الدور مرة واحدة
وبعد اربعة ايام جرب
لان السمكة هتاكل فى اول يوم الحباية المستوية وتسيب الباقي وتستمر علي ذلك كل يوم

طريقة الصيد :
و نعمل وش مجوز بشعر 30 بفاصل 5 سم بين السنين
طول الوش قصير عشان تحس باول نقرة يعني تحت التقل بـ 20 سم
السلاح 6 او 7 بسلاح حامي والافضل يكون دقنه واطى و مفتوح نسبيا
ضع حبة غلة واحدة علي السن الامامي بحيث لاتظهر مقدمة السن الحادة عند الصيد عن طريق شك القمحة فى السن من ناحية مكان الانبات فى الحبة لانة اقوى مكان فى القمحة
و الغماز (حرامي) أصغر غماز تلاقيه و الرصاص ورق "قشر" موزون
ترمى قدام وبعد كده تسحب الغماز براحة لعندك عشان السنار يرسى على الارض ومايعومش يعنى نرقد السنون على الأرض ومن اول سحبة تلطش على طول أشكم شكمة جامدة و بسرعة يعنى ما تستناش لان كدة يبأي السن في فم السمكة

حاول ترجع للخلف قدر الامكان بحيث لاتظهر للسمكة وطول الخيط من فوق الغماز وارمي من بعيد عنها يدوبك تكون شايف الغماز و تسرح لها بالغله وخليك منتبه لاي حركة من الغماز كما يفضل ان ترتدي ملابس لها درجات الاخضر الغامق او الزيتي وهي الوان لا تلفت انتباه السمك وحاول ان تكون حركة العود قليلة قدر الامكان مع التزام الهدوء وعدم الحركة او الصخب لان السمك لو شايفك مش هياكل
ملاحظه هامه ان لا تترك السناره فى الماء مده طويله بدون تحريك (حرك كل شويه ) يعنى ارمى جوه واسحب عليك ناحيه الغله الموضوعه قريب

طريقه حفظها :
ممكن تكون فى طبق مغطي بالمياة موضوع فى الثلاجة
اما إذا كانت مستويه فتوضع فى اكياس تحت الفريزر
ولا توضع بالفريزر عشان لو وضعت بالفريزر بتسود

طرق تحضيرها:
طريقه (1)
نصف كيلو غله يتم غسله بالماء جيدا حتى ينظف من الاتربه تماما وبعد ذالك يتم وضعه فى حله بها ماء ويتم غليها على النار مع التقليب من وقت الى اخر حتى نضوج حبه الغله (نصف سوى)
وبعد ذالك تنزل من على النار " احجز منها شويه للتزفير"
ويترك الباقي فى الحله مغطاه لمده مناسبه حتى انتفاخ حبه الغله حوالى ربع ساعه
ولا تتركها لدرجه انها تتفتح او تنهرى حتى لا تصقط من على السن يعنى القشره لسه مقفوله على اللب وبعد ذالك تغسل بالماء البارد ثم تصفيتها من الميه
ويتم تقسيمها على اكياس وتوضع فى الثلاجه وتكون معده للصيد
عند غسيل الغلة قبل الانضاج (التسوية ) وانت تقوم بعملية
الغسيل استبعد الحبوب التى تعوم على المياة لانها بعد
الانضاج بتكون فارغة من كثير من ما تحوية

طريقه (2)
نغلى الماء جيدا ونصبه علا الغله المراد تجهيزها ثم نغطيها
نتركها حتى تبرد المياة وتشوف الحبه أستوت ولا لا لو لسه مستوتش نسخن كمان شويه ميه ونرمى الميه القديمه ونحط الجديده
بعد ان تتاكد من تسويتها جيدا بس بشرط متكنش طريه قوى تكون يدوب تتكه عليه سنه تلقيها مسكه نفسها شويه
تغير الميه وتحط الغله فى طبق كبير تحت الفريزر وتخلى الميه تغطيها وتسيبها وكل يوم تغير الميه
ثم امسك قمحة واضغط عليها بين اصابعك اذا اخرجت الحبة ما بها والقوام مثل الجبن المثلثات
فهذا رائع
ان كانت ما ذالت بها بعض النشوفية اترك القمح فى الماء كمان شوية
بعد ذلك انشر القمح على ورقة جرايد وتكون جاهزة للاستخدام

طريقه (3)
يمكن استخدام القمح المخمر فى ماء بارد بعد 5 ايام
بدون غلى بالمرة وبدون شطف اثناء التخمير للحفاظ
على رائحة القمح النفازة ويوضع فى كيس قماش

طريقه (4)
اذا كنت مستعجل يمكن تخمير القمح فى ماء مغلى
بعد غسلة مباشرتا وتغطية الاناء ثم بعد ساعتين
يعاد نفس الموضوع مرة اخرى وبعد ساعتان يغلى
القمح على نار هادئة ويلاحظ باستمرار واول ما تفتح
اى قمحة اطفى النار وانشل القمح بواسطة مصفى
شاى وانشرة على ورق جرايد

(4) الريم

التعريف:
الريم وهو نوع من الطحالب المائية التى تتواجد فى البيئة الطبيعية للاسماك وهى لا تصلح الا للاسماك التى تتغذى على النباتات وهو نبات اخضر ينمو علي جنبات احجار النيل وفي اي مكان يوجد به هدار او منحدر كبير للماء
وهناك نوعين من الريم هما ( الزفر ) و (الأسواني) أما الزفر بيكون مش مغسول كويس و خشن حبتين ولونه أخضر غامق و فيه دود أحمر رفيع جداً ( الدود مش شرط) أما الأسواني فلونة أخضر زرعي و شعره طويل و نظيف جداً (وده ليه أكله و ده ليه أكله)

ملحوظة : دائما اشترى الريمه الفاتحه وتكون صابحه سواء ريمة الترعه او ريمة اسوان

انواع السمك :
البلطى والبنى والمبروكة

اوقات الصيد :
أفضل وقت لصيد الريم فى الصيف أو يكون الجو دافى
و في النهار فقط ويفضل بعد الظهر

اماكن الصيد :
لازم يكون الدور المية ماشية يعنى مش واقفة
ويفضل في صيد الريم إن يكون الدور بجوار الليخة (نبات الحلفا أو البوص)

تجهيز الدور:
الطريقة الأول :
((ودي بتستخدم في الأدوار الضيقة)) وهية نجيب ورقة ريم (لفة ريم 50 جرام ) و ناخد قبضتين طين من الأرض و نقسم ورقة الريم إلى جزئين و نحط الريم بالطول في كل قبضة طين بحيث يكون فيه شرشوبة من النحيتين و نرميه في المية في عكس إتجاه التيار بمسافة 20 متر من المكان إللي إنته قاعد فيه و الطين هيتفتت لوحده و يخرج الريم شعرة شعرة .

الطرية الثانية :
و تسمى البراشوت (ودي بتستخدم في الأدوار المفتوحة)) وهية بتاخد من الريم هنا مجموعة شعر بمجموعة شعر المجموعة بحيث نقسم ورقة الريم على عشرة و نربطها بخيط قطن في حجر صغير في حجم البلحة وتلقى بالعشرة في شكل نصف دايرة حولك و على مسافة 20 متر

الطريقة الثالثة
نأتى بزجاجة مياه معدنية و نضع بها تذكرتني ريم مقطعة و مفرية وتوضع في الزجاجة المملوءة نصفها ماء و ترج جيداً و يتم تفريغ محتواها أمامك عند ردة المياة حتى يخرج الريم عن المنطقة التى ترغب في الصيد منها

طريقة الصيد :
خيط الترميل يفضل ان يكون خفيف يعني 20 او 18
السن 10 او 12 لان السمكه بتبلع فدائماً اختار سن الريم مفتوح والحربه حاميه وطويله وتكون السلكه رفيعه
ولو الدور غويط وما فهوش شر كبر السن حسب حجم السمك

ويتم اخذ خصله من الريم رفيعه طولها 5 سم
وتمسكها من المنتصف
وتضعها على رأس السن من المنتصف من عند الخيط بحيث يكون الطرفين سايبين
وتبدأ تلف النصف الاول على السن بدايه من رأس السن المترمل وتظل تلف حوالي 6 لفات الى ان تصل الى سلاح السن
ثم تبدأ بلف النصف الثاني فى الاتجاة العكسي للف النصف الاول
وتسيب الباقي مدلدل من السن ( مرفق صور )

الفله صغيرة ورصاصه توزنها بحيث ما يكونش ظاهر من الفله غير الشفاطة

لو كنت عايز تصتاد بالريم بمعنى إنك لما تكون رايح تصتاد في حتة جديدة بالريم تاخد معاك ورقتين زفر وورقتين أسواني و تحضر الدور بتاعك و تجرب الزفر ساعة و الأسواني ساعة و تشوف اى منهم هيشتغل أكثر

طريقه حفظة :
في ورق جرائد مبلل ولازم يكون رطب دائماً ويتم وضعها فى درج الثلاجة قبل الصيد بيوم واحد ليس اكثر
لانها ان لم تكن طازة بتشيط وتسود
واثناء الصيد تكون فى مكان ضل

طرق تحضيرها:
لا توجد معلومات
(5) العجينه
التعريف:
تعتبر العجينه من اسهل انواع الطعم وارخصها واكثرها انتشارا خاصة في المناطق الريفيه التي يصعب الحصول فيها علي اي نوع من انواع الطعم الاخري
واختلفت الاراء في طريقه صنعها التي تتوقف علي عوامل عديدة منها نوع السمكة المراد صيدها

اماكن الصيد :
يتم اختيار مكان هادى وياحبزا لو كان مدور والمدور هو مكان يلتف به جانب النهر او الترعه لتاخذ شكل نصف دائره فتهدا حركه التيار فيها
ويفضل ان يكون الدور بجوار نباتات او حشيشة كتير فى الماية

اوقات الصيد :
من اول ضؤ نهار الى اخر ويتم استخدمتها بالليل لصيد القراميط وعيب الصيد بالعجينه فى الليل هو ان السمك بياكل على فترات متباعده ولكن حجم السمك كبير ولذلك لا تسطيع العجينه الصمود على السناره فترات طويله

انواع السمك :
بلطى وبنى ( راى ) ومبروكة وشلبية وبوري
والعجينه الزفرة قراميط وبياض
طريقة الصيد :
سنار رقم 6و 7 او 8 و9 و 10 فرنساوى مع خيط 30 او 35
الفلة صغيرة جدا مع حتة رصاصة ورق تخلى الماية واقفة عند اول الفلة وطول الوش على حسب عمق المكان ويفضل ان الغماز يكون قريب من الشط بس مش لازق فيه يعنى ما بين الشط والغماز متر ونص مترين والوش حوالى متر او متر ونص ده حسب عمق المياة

وممكن تشتغل حداف عادى خالص وبدل السنار نعلق فى المدور العياشه ويتم عمل العجينه على شكل قرص ثم بعد ذلك نشك السنار فى اطرافها ثم تغطى السنون بالعجين ونرفع العجين على الخيط

ولعمل العياشة بترمل 5 وشوش عادي بس طول الوش 50 سم لازم يكونوا طول واحد
وتجمعهم مع بعض وتعمل عقدة من بعد السنون بـ 5 سم ومن فوق تسيب 5 سم وتعقد والمسافة اللي بين العقدتين تلزقها بأمير بحيث يلتصق الخيط ببعضه او تركب شفاطه فيها عشان ما تتقعبلش

كما يمكن استخدام العياشة على العايم بفلة بيضه من اللى بتلف الوشوش عليها حجمها 5 سم * 5سم وارتفاع 2 سم يتم خرمها من المنتصف وتمرر الوش الخاص بالعياشة منها من الطرف الاعلي الى ان تصل الي العقدة الخاصة بالسنون وتعقد عقدة تانية من فوق الفله عشان الوش ما ينزلش لتحت
يعني هيكون فى عقدتين كبار قبل وبعد الفله مباشرة
و ويتم عمل العجينه على شكل قرص وتمررها من السنون وترمي هتلاقي السمك الصغير فضل ينقر فيها وتجمع وساعتها هيغري السمك الكبير فيدخل عليه وممكن تجيب السمكة من اي حته خاصة زعنفه الظهر واول ما تشبك ارفع وما تسبهاش عشان الدور ما يبوظش وارمي تانى على طول
تجهيز الدور:
تظفير الدور بقطع صغيره جدا من العيش المبلول بكميات قليله على فترات حتى يتم جذب السمك للمكان وليس بكميات كبيره حتى لا يشبع السمك

طريقه حفظة :
توضع فى اكياس فى درج التلاجه

طرق تحضيرها:
1 - العجينه الجافه (غليظه القوام)
وهي تستخدم لصيد اسماك البلطي
عبارة عن عدد 2 رغيف بلدي طازج تبلل بالماء وتدعك باليد حتي تصبح عجينه متجانسه القوام وقد يضاف اليها قليل من الماء مع الدعك باليد حتي الوصول للقوام المطلوب
وهي من افضل انواع العجينه لصمودها وقدرتها علي التحمل علي السلاح بالإضافة الى تفتت الرده من العجينه الموضوعه على السناره وانتشارها فى مكان الصيد مما يجذب مزيد من السمك .


2 - العجينه الزفرة
وتستخدم لصيد القراميط
عبارة عن عدد 2 رغيف بلدي ني ويضاف اليها دم ذبيحة وكميه من الحنتيت
وتخلط جيدا وتدفن في الارض في منطقة معرضه للشمس لمدة ثلاثة ايام
( لها رائحة زفرة قويه جدا لن تتحملها) نظرا لوجود الخميرة في عجينه الخبز ودم الزبيحة والحنتيت
وجميعها تحللت تحت تاثير اشعة الشمس وممكن تضيف زبل حمام او زبل ابو قردان
وهي فعاله في صيد القراميط
بالنسبه للحنتيت يباع عند العطار بالجرام وبـ 5 جنيه يكفيك
لونها بني داكن - ناعمة الملمس - طرية عند الضغط عليها ريحتها عاديه فى الاول بس بعد تجهيزها بتكون سيئة جداً ودي بيطفش منها السمك ما عدا القراميط والثعابين
ولتحضيرالحنتيت نفتته قطع صغيرة ثم وضعه فى زجاجة فاضية ونصب علية مية بتغلى ونفضل نرج الزجاجة لغاية الحنتيت ما يدوب وبعدين نستخدمة فى العجن
انصح باستخدام جوانتي بلاستيك يباع في الاجزخانة
من اللممكن استخدام العجينه بدون دفن او الاستغناء عن شيء من الاشياء السابقة بس دة هيقلل مفعولها

3- العجينه اللينه
وتستخدم لصيد البوري
وهي كوب من الدقيق
ملعقه من الزيت
ملعقة من السكر
يعجن الخليط بالماء حتي تصبح عجينه متجانسة
ويستدل علي ذلك بانه عند مسكها لا تعلق بالاصابع

وقد يضيف عليها البعض قليل من الاضافات
قطعه من الشبه - فص من الثوم - صفار بيضة - قطعه من الجبنه المثلثات - علف الاسماك الزينه - ملعقه من الملح

4- العجينه المستويه
وتستخدم ايضا لصيد البوري
كوب من الدقيق - ملعقتان من النشا - ملعقة من الزيت ملعقه سكر
تخلط المقادير للحصول علي عجينه سايلة
ترفع علي نار هادئة مع التقليب المستمر حتي تصبح عليظه القوام
ومن المستحسن عند استخدام هذا النوع من العجينه ان يكون معك كمية من الدقيق
لانه من الممكن ان تسيح هذة العجينه عندها تستخدم الدقيق لضبط قوامها

5 - عجينه الفينو
العيش الفينو او الكايزر ويغمس فى ماء البحر (لا ينقع) بعد تقشير الجزء الغامق إذا كان الخبز غير طازج
ثم يعجن باليد لمده دقيقتين و يمكن اضافة ماء البحر لتلين العجينة عند الحاجة
كما يمكن وضع اللبابة كما هى على السن دون بل ولذلك يوضع الرغيف فى كيس نايلون حتى لا تجف اللبابة

6- العجينه النص سوا
اذهب الي الفرن الصبح بدري وقبل السير اللي بيمر عليه العيش ما يسخن قوي
اطلب من الفران يحط كام رغيف حسب الحاجة وتضعهم على بعض واقوم بتقطيعه حسب الرغبة اما دواير لتركيب العياشة اواما شرائح طولية ثم تقطعها بالعرض فتجد عندك مكعبات يتم تدكيكها في السن وسحبها للخيط
كما يمكنك شراء عجينه نيه من الفرن سواء كانت عجينه عيش او فطير وتتركها الى ان تخمر وممكن اضافة ثوم وزيت وتدخلها الفرن الساخن لمدة 5 دقائق وبعد ذلك اعجن واتركها تبرد

7- عجينه على النار
1- كوباية دقيق 2- نفس الكوباية مياه ولكن أقل بحاجة بسيطة
3- ملعقة ونصف زيت ( ملعقة كبيرة )
طريقة التحضير :
توضع المياه مضاف إليها الزيت على النار حتى تبدأ فى السخونة وليس الغليان ... بمعنى أول ما تلمح المياه هتبدأ تسخن ويظهر على وش المياه فقاقيع هتضيف عليهم الدقيق .
وتقوم بالتقليب المستمر حتى تماسك العجينة ومن الممكن أن تبعد القدر عن النار لحظة لحين تماسكها وترجعها تانى على النار وتتحسسها بإيدك عشان تعرف إنها بقيت تمام .
بعد كدة تسيبها تبرد بدون ما تحفظها فى أى حاجة لحين ما تبرد تماما . لو حصل و حفظتها فى أى حاجة هتعرق ولو عرقت هتعجن وتلاقيها بتلذق فى أصابع إيديك أثناء الصيد .

8- العجينه القطنية
ودي بأى عجينه زى الحديد على السن
وهيه على فكرة انك تستخدم اى نوع من الانواع السابقه بس هتضيفلوا ( قطن )
ايوة قطن ويفضل قطن خشن ممكن تجيبه من عند المنجد او محل البويات بتاع دهان الخشب
ودة بتقطعه حتت صغيرة جداً وتعجنه مع العجينه بس بكميه مش كبيرة
وانسي العجينه فى الميه
(6) الخضروات
التعريف:
اصعب انواع الصيد لانها عايزة صبر جامد بس الضربه بتاعتها جامدة لان اولا مش بيدخل عليه غير السمك التقيل
كمان بيحتاج حساسيه شديده من الصياد وبيحتاج كمان فن التعامل مع السمك

اماكن الصيد :
من فوق بوابات المعديات الصغيره والاماكن الموجود بيها حجاره

وقت الصيد :
فى النهار

انواع السمك :
المبروكه والبني وممكن تغلط ببلطي

طريقة الصيد :
سنون من مقاس 4 فرنساوي
طول الوش بيكون حوالي نص متر
يحتاج الى رمال السنارة 40 أو 50 على الأقل ويكون على المكنة خيط 50 على الأقل
أما كيفية التطعيم به فكانت تتم بتقطيع الأوراق إلى شرائط صغيرة بعرض 2 سم و طول 4 سم و يدخل السن في طرف الشريط ثم يقلب الشريط ليلف حول رقبة السن و يدخل نهاية الشريط في السن مرة أخرى
أما طريقة الصيد فهي مثل الريم على العايم يعني قرمة قصيرة و بدون رصاصة و فلة صغيرة و تترك للتيار و تمشي مع الفلة تتبعها وعندما تأكل السمكة الفلة تجري و لا تغطس و تحتاج لشكمة قوية

تجهيز الدور:
رمي كميه صغيرة من نفس نوع الطعم بس في الخيار بنختار خيار بقشرته مش متقشر زي اخيار التطعيم

طريقه حفظة :
في الثلاجه

طرق تحضيرها:
انواع الخضروات اللي بتستخدم :
الخص - عروق الكرنب -الخيار -الجزر
الكرنب والخيار والجزر دول لازم يتسلقوا نص سليق لحد ما زفارتهم تبان
والخيار لازم نقشره عشان قشرته السميكه متصعبش من حركه قطعه الخيار علي السن وبالتالي ضياع السمكه

(7) الفواكه

التعريف:
صيد صعب ويحتاج لصبر
اماكن الصيد :
اماكن تواجد المبروكة بجوار الحشائش

وقت الصيد :
في النهار
اما بالليل للقراميط

انواع السمك :
القراميط – المبروكه – البني – البلطي - قشر البياض

طريقة الصيد :
يحتاج الى رمال السنارة 40 أو 50 على الأقل ويكون على المكنة خيط 50 على الأقل
ثالثا الرمى حيكون حداف
رابعا لازم يكون معاك جدالة أو شوكة علشان تطلع السمكة

الصيد بالعنب يتم تثبيت سنارتين اسفل الرصاصه على بعد 25 سم للسناره الاولى و50 سم للسناره الثانيه و ويتم ادخال 7 حبات عنب الى 10 حبات فى منتصف العنبه بحرص مكونه شكل حبات السبحه ويكون العنب مغطى السن وبقية العنب مثبت فى بقيه الخيط اعلى السناره والسن المناسب للعنب هو رقم 6 او 7 فرنساوى ويكون عنب بناتى أصفر وتكون الحباية جامدة وماسكة نفسها
للصيد بالجوافة والطعم جوافة تجيب واحدة الجوافة وتقطعها اربعة وتاخد ربع تعدى السن من ظهرها وتشبكة فى اخرها
مفيش احلي من الجوافه البلدي اللي ريحتها تبان من علي بعد)للصيد بالبلح بيكون بلح رطب أسود فقط وتشق البلحة نصفين بالطول وترمى النواية وتدكك النصف الأول
زي ماتكون بتخيط بالأبرة ونرفع النصف ده على الخيط من فوق وتكرر نفس الطريقة على النصف الثانى
وتشبك السن فى أخر البلحة من ناحية ما السمكة حتاكل
الصيد بالتوت : يتم تركيب توته على سن 8 وتشتغل غماز وياسلام لو المكان اللي بتصتاد فيه تحت شجرة توت
ممكن تشتغل بفله تسريح كبيرة
تجهيز الدور:
رمي كميه صغيرة من نفس نوع الطعم
طريقه حفظة :
في الثلاجه طبعاً

طرق تحضيرها:
لا تحتاج لتحضير

( النسيله

التعريف:
نوع من الحشائش ينمو على ضفاف النهر والنوع المستخدم هنا نسيله باردي مش نسيله غاب لان نسيله الباردي اطري واخف حديه من الغاب والسمكه بتقبل عليها اكتر

اماكن الصيد :
مياة هاديه بجوار الحشائش ويجب ان تعرف ان المبروكه موجودة ام لا عن طريق
وقت الصيد :
بالنهار
انواع السمك :
المبروكة ونادر لما بتدخل عليك غلطات بلطي
طريقة الصيد :

فيه طريقتين الطريقه الاولي بتكون برصاص وغماز ريم يعني تقل يوزن غماز متساوي نازل بسحبه وحجمه كبير
وسنون 6 فرنساوي دقنه واسعه

طريقه التطعيم بنفرك النسيله في السن كويس اوى وبعد كده بنلفها علي السن لحد ما نخفيه وبنساوي اولها مع طرف السن

الطريقه التانيه (ودي عاوزه صياد ايده حسساسه اوي )
بنجيب غاب افرانجي مفرغ بنروح لاي واحد من اللي بيعملوا كراسي جريد نخليه يعمل حلقه وتكون واسعه ويستحسن لو معاك اكتر من حلقه

بنحط الحلقه بتعوم علي وش المايه وبنربطها وثبتها زي العياشه بالضبط
وبنرمي في حدود الحلقه نسيله (يعني كانك بتنصب دور غله بالضبط)
وبتستني شوية لحد ما تنزل وتنزل زي الغله متكون واقف عمودي علي الدور تكون بعيد عن الدور
وفيه حاجه من الاتنين يا اما بتطعم زي الطريقه اللي فاتت وتنزل بحيث يكون الطعم تحت الحلقه مباشرتنا
يا انا بتطعم علي سنون سنه زي ما قولنا قبل كده من غير لا غماز ولا تقال علي وش الحلقه
وتجيب نسيلة او اعواد ذرة اخضر وتيجى رابطهم فى بعض على شكل حزمة وبعد 2 مترمن الحبل تجيب صخرة صغيرة نظام تقل وترميها فى الماء وتكون ماسك اول الخيط فى ايدك وتقعد حوالى ربع ساعة هتلاقى الخضرة الى انت راميها بتتشد والسمك عمال يشد فيها تقوم جايب عرق من قلب الخضرة يكون طرى وتطعم بية زى شغل الريم بس يكون السن كبير والخيط حوالى 40 او 50 وربنا معاك انا جربتها كتير وربنا اكرمنى باوزان حوالى 15 كيلو واصغر

تجهيز الدور:
الطريقه دي مش محتاجه تظفير لان طبيعي اننا بنصطاد جنب مصدر للنسيله

طريقه حفظة :
لا تحتاج

طرق تحضيرها:
لا تحتاج

(9) الحشرات




الصرصار " الفانتوم "



التعريف:
غني عن التعريف (الصيادين بيسموه فانتوم) و الصراصير لها رائحة زفاره يعلمها السمك تماما يعني ما ينفعش معاة صناعي لان نسبة البروتينات فيه عاليه جدا وأصحاب العلم يشبهونه بالجمبرى ويقال ان الجمبرى هو صرصار البحر وإن تواجد فى المكان يبأي السمك مش هياكل غيرة

اماكن الصيد :
بالقرب من الشاطيء

وقت الصيد :
بالليل والنهار

انواع السمك :
احسن طعم على الاطلاق وبدون مبالغة لافضل سمكة فى النيل وهى البلطى

طريقة الصيد :
فله زي صيد الطعم على سن 8
ويقسم الى نصفين إن كان من الحجم الكبي
ر
تجهيز الدور:
مش محتاج

طريقه حفظة :
برطمان مثقوب ثقوب صغيرة من الغطا
طرق تحضيره:
يباع فى بعض محلات الصيد بربع جنيه الواحد
وطبعاً كلنا عارفين بنجيبه منين
هتحط قماشة عليها لزقة صراصير ممسوحة كويس فى الشارع بليل عند أى طوب أحمر أو زبالة أو ما شابه , أو فى منور البيت الصبح هتلاقى القماشة غرقانة صراصير ....
لقطهم زى البطل و اطلع للصيد ..

ونستخدم جوانتي طبعاً لانه بيحمل بكتريا كتير اوى ضارة

الحفار ( كلب البحر )

الحفار)
وهو كائن مؤذي بشكل كبير لانه يتغذي علي جذور النباتات فيسبب جفافها
وهو يكثر في موسم زراعة البصل والاخوة مزارعي البصل يستخدمون له سم خاص للقضاء عليه

السمسم او ابو النطاط او البرغوت

التعريف:

هى حشره ويعشقها السمك وهى صغيرة جدا مثل الخنافس تعيش اسفل طين الترع تقفز فى اول فرصه من الصياد لذلك اسمها ابو النطيط واعلم انها اذا تم الصيد بها انتهى انواع الطعوم الاخرى

اماكن الصيد :
افضل مكان هو الترع

انواع السمك :
البلطي

طريقة الصيد :
يصعب التعامل معها اى انها حشره صغيره تحتاج الى سن صغير وحامى جدا نمره 10 واقل .
ونطعم ب 3 وتطعم مع السن الاولى والنانيه بالعرض والثالثه مع السن وجزء منها فى الخارج. .
تعض السمك عليها شد بهدوء تام واترك الخيط تجد السمكه تسحب الغماز بقوه اضرب والرازق هو الله .
معلومه هامه لا بد من ان يكون الغماز صغير جدا ومحرر بزياده فى المياه .
الرمال صغير جدا والسنون قريبه الفرق لا يزيد عن 5 سم بين السن والاخر .

تحضير الدور:

السبله .. ارمى بها فى المياه واترك المكان فتره نصف ساعه فيجمع السمكه ويتم الصيد بعدها بالسمسم .



(10)المصارين



التعريف:
يطلق عليه الطعم الدولي وهى مصارين الفراخ او البط او الحمام
و مصران البط او الحمام الاولى لانها زفرة جدا والتانية لانها بتبقى صغيرة وسهل تدكيكها

اماكن الصيد :
تعمل فتحة فى الهيش اوالبوص او ورد النيل

وقت الصيد :
باليل من شهر 5 إلى أخر شهر8

الاسماك الاكله :
القراميط - الثعابين - ممكن غلطات

طريقة تحضيرها :
حضرتك بتجيب المصارين من عند بتاع الفراخ
و تفرزها من بعضها وتضعها علي خمس ست ورقات جرائد فوق بعض
وتضعها في مكان جيد التهويه وترش عليها ملح وتقوم بتغير الورق علي فترات
حتي يتماسك قوامها لانها بتبقى مظفلطة اوى وصعب تتحط على السن
ثم تقوم بتقطيعها
يفضل تبقى طازة مش مملحة وكمان ممكن تقفل عليا الكيس لمدة 6 ساعات بتبقى ريحتها فظيعة وبتجذب القرموط من اى مكان ومكن حضرتك تحشيها توم مفروم بيغرى القرموط جدا وخصوصا ان حضرتك عاوز القرموط بالذات لأن المصران ممكن يجيب معاك بياض ورعاد وبلطى

طريقة الصيد :
شعر من 60 الى 80
2- ماكينة قوية جدا وسريعة
3-فيبر ناشف ويفضل من 3.6 الى 4.5 متر
4- سن من 01 الى 05 ملوى وسلاح محمل معلقة طويلة بحربتين على المعلقة

طريقة تركيبها في السن تغز حته وتخرج حته مش تدككها لو دككتها مرة واحدة هتطلع بسرعة
ويفضل تشتغل غماز او على المعلق لأن القرموط بيخش عليه من تحت لفوق
والمهم ان حضرتك ماتجريش على الفيبر من اول ضربة ولكن تستنى بعد ضربتين تلاتة على الاقل لان القرموط سمكة ذكية جدا بتشد الطعم الاول بشواربها عشان تدوقه وتطمن وبعدين بتضربه بديلها ولما تتأكد ان الدار أمان بيدخل بجشع يبلع على طول
يفضل انك ترمل السنار منه فيه يعنى على الخيط الرئيسى على طول بدون مداور او غيره وممكن تستخدم قشرة رصاص خفيفة وبلاش التقل الكبير

تجهيز الدور:
بصنع فتحة في وسط البوص والهيش ونقوم بتزفير الفتحة بإلقاء المصارين فيها ثم نقوم بعد حوالي نصف ساعة بإطعام السنارة بالمصران وعقدة جيدا ثم إلقائة في الفتحة وترك السنارة معلقة لكن كن حذرا فالقراميط غاية في الشدة والذكاء فابعد عن المكان قدر الامكان
عشان القرموط الكبير مابياكلش وهو شايفك


  رد مع اقتباس
The Following 7 Users Say Thank You to محمد حسام For This Useful Post:
ahmed.76 (04-21-2012), أشرف صبرى (04-22-2012), bodygard 34 (09-27-2013), ابوالصلح (05-04-2013), Compact (04-22-2012), dr.alaa rasmy (01-21-2013), Trigger (04-21-2012)
 
قديم منذ /04-21-2012, 08:09 PM   #2

ahmed.76
صياد نشيط

ahmed.76 غير متواجد حالياً

 رقم العضوية : 129
 تاريخ التسجيل : Jan 2012
 المشاركات : 182
 النقاط : ahmed.76 is on a distinguished road
 تقييم المستوى : 10
 قوة التقييم : 13

Thanks: 551
Thanked 225 Times in 139 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

موضوع جميل مشكور على المجهود


  رد مع اقتباس
The Following User Says Thank You to ahmed.76 For This Useful Post:
أشرف صبرى (04-22-2012)
 
قديم منذ /04-21-2012, 10:19 PM   #3

Trigger
المشرف العام

Trigger غير متواجد حالياً

 رقم العضوية : 197
 تاريخ التسجيل : Feb 2012
 المكان : THUNDERBOLT
 المشاركات : 2,574
 النقاط : Trigger will become famous soon enough
 تقييم المستوى : 50
 قوة التقييم : 15

Thanks: 2,487
Thanked 2,548 Times in 1,555 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

موضوع شامل و ﻻبد من تثبيته


  رد مع اقتباس
The Following 2 Users Say Thank You to Trigger For This Useful Post:
أشرف صبرى (04-22-2012), Compact (04-22-2012)
 
قديم منذ /04-22-2012, 08:58 AM   #4

kefafy
صياد محترف
 
الصورة الرمزية kefafy

kefafy غير متواجد حالياً

 رقم العضوية : 87
 تاريخ التسجيل : Jan 2012
 المشاركات : 770
 النقاط : kefafy is on a distinguished road
 تقييم المستوى : 13
 قوة التقييم : 13

Thanks: 711
Thanked 658 Times in 483 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

جزاء الله خيرا ياباشا
زى مقال احمد بيك ياريت يتثبت


توقيع kefafy :

سبحان الله وبحمده سبحان الله العظيم

رسمنا علي القلب وجه الوطن نخيلا ونيلا وشعبا اصيلا

وصناك يامصر طول الزمن ليبقي شبابك جيلا فجيلا

يد الله يا مصر ترعي سماك وفي ساحة الحق يعلو نداك

ومادام جيشك يحمي حماك ستمضي الي النصر دوما خطاك

  رد مع اقتباس
The Following User Says Thank You to kefafy For This Useful Post:
أشرف صبرى (04-22-2012)
 
قديم منذ /04-22-2012, 02:49 PM   #5

أشرف صبرى
صياد محترف
 
الصورة الرمزية أشرف صبرى

أشرف صبرى غير متواجد حالياً

 رقم العضوية : 281
 تاريخ التسجيل : Mar 2012
 المكان : مدينة نصر
 المشاركات : 743
 النقاط : أشرف صبرى is on a distinguished road
 تقييم المستوى : 22
 قوة التقييم : 13

Thanks: 1,490
Thanked 925 Times in 540 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

فعلاً الموضوع لو إتثبت ناس كتير هايستفادوا


  رد مع اقتباس
The Following User Says Thank You to أشرف صبرى For This Useful Post:
kefafy (04-22-2012)
 
قديم منذ /11-28-2012, 01:48 PM   #6

محمد الجارحي
صياد جديد

محمد الجارحي غير متواجد حالياً

 رقم العضوية : 1105
 تاريخ التسجيل : Nov 2012
 المكان : القاهرة
 المشاركات : 5
 النقاط : محمد الجارحي is on a distinguished road
 تقييم المستوى : 10
 قوة التقييم : 0

Thanks: 0
Thanked 3 Times in 3 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

موضوع رائع جداً
جزاك الله خيرا
كنت اتمني يكون الموضوع مدعم بالصور علي العموم مجهود ممتاز


  رد مع اقتباس
 
قديم منذ /01-21-2013, 03:41 AM   #7

dr.alaa rasmy
صياد جديد

dr.alaa rasmy غير متواجد حالياً

 رقم العضوية : 337
 تاريخ التسجيل : Mar 2012
 المشاركات : 3
 النقاط : dr.alaa rasmy is on a distinguished road
 تقييم المستوى : 10
 قوة التقييم : 0

Thanks: 5
Thanked 0 Times in 0 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

اية يا استاد محمد الموضوع الرائع دة انا لسة مبتدئ ومش عارف اقولك انا استفدت اد اية ربنا يباركلك


  رد مع اقتباس
 
قديم منذ /05-04-2013, 02:34 PM   #8

ابوالصلح
صياد جديد

ابوالصلح غير متواجد حالياً

 رقم العضوية : 3376
 تاريخ التسجيل : May 2013
 المكان : بين الرياض والقاهرة
 المشاركات : 7
 النقاط : ابوالصلح is on a distinguished road
 تقييم المستوى : 10
 قوة التقييم : 0

Thanks: 1
Thanked 4 Times in 3 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

اشكركم بشده اكثر من رائع


  رد مع اقتباس
 
قديم منذ /09-26-2013, 09:40 PM   #9

زاما مجدي
صياد جديد

زاما مجدي غير متواجد حالياً

 رقم العضوية : 4530
 تاريخ التسجيل : Sep 2013
 العمر : 35
 المشاركات : 43
 النقاط : زاما مجدي is on a distinguished road
 تقييم المستوى : 10
 قوة التقييم : 0

Thanks: 0
Thanked 3 Times in 3 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

مشكووووووووووور ..


  رد مع اقتباس
 
قديم منذ /10-09-2013, 10:22 PM   #10

رافد حسن
صياد جديد

رافد حسن غير متواجد حالياً

 رقم العضوية : 3695
 تاريخ التسجيل : May 2013
 المشاركات : 6
 النقاط : رافد حسن is on a distinguished road
 تقييم المستوى : 10
 قوة التقييم : 0

Thanks: 0
Thanked 5 Times in 2 Posts
افتراضي رد: موسوعة شاملة عن انواع الطعوم لصيد الاسماك في النيل وطرق صناعتها

 

شكرآ على المعلومات القيمة و جزاك الله ألف خير


  رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 08:07 PM


Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
Ads Management Version 3.0.1 by Saeed Al-Atwi



أقسام المنتدى

الأقــســـام الــعـــامــة @ الصيد العام @ قسم الأسلحة @ أسلحة ضغط الهواء @ السلاح الحي والخرطوش @ أسلحة الصوت ( محدثات الصوت ) @ الورشه والصيانه @ الصيد وانواعه والرحلات @ رحلات الصيد بالصور @ الصيد البري @ المطبخ @ قسم السوق @ بيع وشراء الاسلحه الهوائيه و مستلزماتها @ بيع وشراء مسدسات الصوت ومستلزماتها ( محدثات الصوت ) @ السوق العام @ الإدارة @ استراحة الصيادين والهواة @ العياده @ الصيد البحري والنهري @ بيع وشراء ادوات صيد السمك @ مجلة صيادين مصر @ حيوانات و طيور الصيد @ منتدي السيارات @ شخصية العدد @ تاريخ الصيد والرمايه والاسلحه @ منتدى هواة تربية الطيور والأسماك والحيوانات الأليفة @ قسم هواة الحمام واليمام @ قسم هواة الصقور والطيور البرية @ قسم هواة الببغاوات وطيور الزينه @ قسم هواة اسماك المياه العذبة @ قسم هواة اسماك المياه المالحة @ قسم هواة الكلاب @ قسم هواة القطط @ مقترحات تطوير المنتدى @ المحذوفات والموضوعات المكررة @ منتدى هواة تربية الطيور والاسماك والحيوانات الأليفة @ سوق سيارات منتدى صيادين مصر @ بيع وشراء السلاح الحي و بنادق الخرطوش المرخصة @ الاعلان عن رحلات الصيد البحري وطلعات الصيد البري @