المساعد الشخصي الرقمي

مشاهدة النسخة كاملة : افضل الطرق للصيد عن طريق الجر بالرابيلا


محمد كمال المحامي
01-26-2012, 08:33 AM
السلام عليكم يا احلى مجموعة صيد
عايزين نطرح موضوع الجر لو سمحتولى عشان نستفاد منه و نتبادل المنفعة و المعرفة و هل الجر ده حظ و لا هو فعلا صيد مجدى
ان شاء الله هافتتح الموضوع بالقليل اللى عندى و الباقى همتكم معايا
المعدات المطلوبة
بوص جر
مكن جر
رابالات مقاسات و الوان و اعماق مختلفة و و ياريت لو من كل صنف 2 قطعة
قبقاب او شبشب ( معدة صيد تساعد على تغطيس الرابالات اكتر من العمق الطبيعى ليها )
عدة تسييخ و دى لعمل رابالا من السمك الطبيعى
سبح جر
طبعا كل ما عرض المركب كان اكبر كل ما كان افضل لأنه بيعطى الفرصة لوضع بوص و مكن و عدة اكتر
بافتراض انه عندى 8 ماكينات باحاول انى اعمل تشكيل من الرابالات يحاكى سرب السمك على الطبيعة بمعنى بانزل ب2 رابالا من النوع اللى بيطفو و 2 من النوع الوسط و 2 من النوع العميق وممكن انزل بقبقاب مع السمك الطبيعى.
برضه مهم جدا ان المسافات تبقى معقوله يعنى ابعد رابالا ما تبعدش عن المركب اكتر من 60 متر و اقرب واحدة 30 متر و انا شخصيا بافضل ان شخص واحد يكون مسؤل عن فرد المكن و تقدير المسافات و فيه كمان عداد للمسافات ممكن يتركب على المكن .
بكده تبقى سيادتك غطيت اكبر مساحة من الأعماق و عملت تشكيل اقرب ما يكون لسرب سمك ماشى فى الميه
نيجى لموضوع السرعة و المفترض انه زى ما الكتب بتقول ما يزيدش عن 5 عقده و ممكن لحد 3 لأنه لو اسرع من كده ممكن السمك الطبيعى يتهرى حتى لو تم خياطة فمه او خياشيمه
طبعا افضل اماكن للجر هى اللى جنب الشعب لان السمك الكبير بياكل الصغير اللى بيحتمى بالشعب خلال فترة النمو و بالتالى الكبير بيستنى اى غلطه من الصغير عشان ياكله و بالتالى لو الصياد لقيته ماشى فى وسك البحر عشان يخليك تجر تاكد انك بتتفسح و لو جت حاجه فهى صدفة او انك تكون دخلت فى سرب محترم
المهم هارجع لنقطة تشكيل الرابالات و هى انه لو ضرب معاك سمك حاول تعرف هو ضرب على اى نوع من الرابالات و ممكن تغيير الطقم اللى فى الميه و ارجع لف تانى على المنطقة اللى ضرب عليك السمك فيها خاصة لو تونة او باراكودا حجم وسط لأن دى معظم الأحيان بتمشى فى مجموعات كبيرة و لما بتكبر بالذات الباراكودا بتمشى لوحدها
أوقات الجر من اول ضوء لحد قبل الضهر بساعة و بعدين من العصر للغروب
طبعا الشتاء افضل من الصيف فى الجر لأن السمك بيطلع على وش الميه نتيجة برودة الميه و فى الصيف بيغطس تحت شوية تفاديا لسخونة الطبقات العليا من الميه و فى الحالات دى طبعا القبقاب و الرابالات الغاطسةو السبحة افضل و فرصها اكبر
فيه حاجة تانية كمان حلوة جدا ممكن تتعمل انك بتربط 5 خيوط فى ظهر المركب على مسافة 10 الى 15 متر و بتنزل معاهم شوية رابالات ريش او الوان لكن بدون سن و دول بيتسموا teasers يعنى ""غياظات"" و دى مهمتها فى المقام الأول لفت و جذب انتباه السمك و من غير سن تانى لأنه ممكن سمكة تيجى فعلا تاخدها
ملحوظة هامة جدا و هى ان ريس اللنش مايخادش الملفات على العاصى او على الضييق لأن ده ممكن يلخبط الخيوط مع بعضها و تبقى مشكلة
لو هاتنزل بمعلقة جر خلى بالك لأن المعلقة حركتها فى الميه زى الروحة و يفضل تبقى ابعد حاجة عشان ماتجبش باقى الرابالات
انا اكيد نسيت حاجة فياريت تفتكروا معايا
و اشكركم على وقتكم الغالى و ارائكم المفيدة و اعتذر عن الأطالة

منقول بالنص