بسم الله الرحمن الرحيم السلام عليكم اهل المنتدي الكرام .. في السطور القادمة احاول شرح تجربتي مع مسدس الغاز فالترو 92 .. مع الأخذ في الاعتبار ان خبرتي محدودة الي حد ما في هذا المجال .. فسامحوني مقدما اذا وجدتم خطأ في المعلومة و برجاء تصحيحها ... اولا .. المسدس Valtro 92 airgun co2 -المسدس شبيه البيريتا 92 ... يعمل بأنبوبتين غاز في الخزنة .. الخزنة لها زر اسفل الزناد " زي الطبنجات العادية " الضغط علي الزر يحرر الخزنة ..يوضع فيها الانبوبتين ثم يتم ارجاعها لمكانها ثم التقريط عليها بواسطة مسمار قلاووظ اسفل الخزنة. الفينيش : من افضل المسدسات اللي ممكن تشوفها في السوق .. اللون الاسود بتاعه ممتاز .. اللوجو بتاع الفالترو محفور علي جانبي المقبض .. .. علي الجانب الايسر من الماسورة حتلاقي اسم المسدس ) airgun 92 (و العيار بتاعه محفورين علي الماسورة .. علي الجانب الايمن حتلاقي الماركة و اللوجو برضه محفورين علي الماسورة .. بالاضافة للسيريال . الخلاصة : المسدس جيد جدا من ناحية الفينيش .. و لا يوجد فيه كتابة مطبوعة و لا ملزوقة و لا اي حاجة من الحاجات دي .. كل البيانات المدونة عليه محفورة مما زادة قيمة في الشكل . * طريقة العمل : يوجد أعلي زر الامان و أمام النشان الخلفي مباشرة ..يوجد زر منزلق .. عند سحبه للخلف تفتح الماسورة ..يوجد داخلها عدد " 2 " ساقية ..كل منها تستوعب 7 رشات ( اي ان المسدس قادر علي اطلاق 14 رشة متتالية ) ..الساقيتين بيركبوا مع بعض ثم يتم غلق الماسورة مرة اخري حتي تسمع "" تكة "" الزر المنزلق . و كده يبقي جاهز للعمل . * الأداء .. خبرتي في مجال مسدسات الرش مش كبيرة .. و لم اتعامل مع العديد من المسدسات الاخري ..لذلك حيكون شرحي مجرد علي هذا الموديل ..و حضراتكم ممكن تقارنوا بينه و بين اي موديل اخر اتعاملتم معاه . - الصوت .. مسدسات الرش مش مصممة عشان تطلع صوت قوي "" باقول كده لان لقيت ناس سألتني بالحاح علي صوته "" .. عموما انا شايف ان صوته مش بطال كمسدس رش.. و بيكون قوي خاصة عند ضرب الخزنتين الاولي و الثانية (( لان انابيب الغاز بيكون لسه ضغطها عالي ) - النيشان : انا جربته في مدي قصير لا يتعدي 15-20 متر ... ممكن اقول ان دقته في التنشين جيدة جداجدا في مجال الــ 10 - 15 متر ... و ممتازة في اي مجال اقل من ذلك .. و اكثر من ذلك بصراحة لم ادقق كثيرا . - المدي المؤثر : ..المقصود به المدي اللي الرشه بتكون بكامل قوتها ..يعني ممكن تخترق الهدف لو كان كرتون او كاوتش خفيف او حتي كانز بيبسي ( خاصة لو بتستعمل رش مدبب ).. و المدي المؤثر في حدود الــ10 متر ""اكثر او اقل قليلا " ".. و لو اقل بتكون النتيجة هايلة ... وممكن يكون اكتر من كده لكني لم الاحظ جيدا .. انا ضربت علي اهداف ابعد من كده .. و سمعت صوت الرشة بتخبط في الهدف ..لكن لم الاحظ تحديدا مكان الاصابة و لا قوتها.
عمر انابيب الغاز .. انابيب الغاز لو راكبة كويس و مفيش تسريب ممكن الانبوبتين يعيشوا معاك 5 خزن( 5 * 14 = 70 رشة ) ( اكثر او اقل )..عملوا معايا 6 خزن ( 84 رشه ) لكن طبعا كانت قوة الرشة و الصوت ضعاف جدا .... افضل اداء دائما بيكون للخزنة الاولي و الثانية .. وبعد كده الموضوع بيضعف بالتدريج .
اجمالا .. مسدس شيك جدا ..قيم ..ادائه جيد جدا .. الزناد بتاعه تقيل نسبيا ... لازم تتعامل معاه كتير في الاول علشان تتعرف عليه اكتر ..لانه ساعات بيكون مسدس " غتيت " من الغتاتة .. احيانا الساقيتين مش بيكونوا مظبوطين فوق بعد ..فبتلاقي الرشة طالعة "" مايعة " في القوة و الصوت .. لازم تفتح و تظبط الساقيتين و بعدين تضرب تاني ..احيانا الانابيب مش بتعمل صوت ( التسريب )اللي مفروض تسمعه و انت بتقرط عليهم ..ساعتها لازم ترجع تفك المسمار سنة بسيطة لحد ما تسمع الصوت و بعدين تقرط تاني ... و هكذا ...
********** عموما ..دي اجمالا كانت خبرتي البسيطة في التعامل مع الفالترو .. انا شخصيا راضي عنه بنسبة 75% خصوصا في ظل نقص و احيانا انعدام البدائل الموجودة في السوق . ----- ارجوا ان اكون قد افدتكم . تحياتي للجميع
100 100 يا ابو خليل
معلومات طالعة من مقتنى و مجرب و يحتذى بها عند شراء نفس الموديل
تسلم يا أحمد بك ده من ذوقك .. و احنا أكيد بنتعلم منك و من الزملاء الافاضل في المنتدي ...
و مدام ذكرنا موضوع الشراء أحب اقول لأي حد عايز يشتري المسدس ده ""او مسدسات الرش عموما "" انه يجربه كويس عند الشراء ..بعض المسدسات دي ممكن يكون فيها عيوب صناعة ... يا ريت المشتري يتأكد من صوت و قوة الرشة بالتجربة علي الرش ..مش صوت الضربة فقط .. كذلك تأكد من عدم وجود تسريب في الغاز ..ممكن تعرف الموضوع ده بوضع المسدس من ناحية المقبض علي اذنك لسماع صوت التسريب ان وجد .
و ربنا يوفق الجميع
تجربتي مع الــ Valtro 92 airgun
العرض العادي
