[محمد كمال المحامي]

صور طلعة صيد للكونيسة ( شرم الشيخ ) يوم 11،12/10/2013 على مركب لينا

اولاً كل عام وانتم بخير بمناسبة عيد الأضحى المبارك

الطلعة كانت الى الكونيسة يومي 12/10/013 و 11

على مركب لينا مع مجموعة مكونة من خمسة من مدينة 6 اكتوبر

المركب كانت جديدة علينا و أول مرة نطلع عليها وانا عرفت بالصدفة من حوالي اسبوعين انها مملوكة لعميل عندي في المكتب

كانت بداية الرحلة اننا طلعنا من مدينة 6 أكتوبر يوم الخميس الساعة 4 عصراً لنصل الطور الساعة 12 صباحاً

نزلنا في فندق على البحر في الطور للراحة وانطلقنا الساعة 7.5 صباحاً الى الكونيسة

لقينا استقبال زي الفل من ريس المركب عم محمود ( أبو سويلم ) والبحري حماده ( أبو أحمد )

المركب صغيرة وقلقنا أول ما شوفناها وحسينا اننا مش هنصطاد

المهم المركب طلعت في حدود 8.5 صباحاً وجهزنا مكن الجر ولكن الوقت دا مش وقت صيد الجر

وصلنا للمكان اللي عم محمود وعدنا اننا هنشتغل فيه واسم المكان ( النوغش )

الهوا كان معقول وبدأنا التسقيط وكان شغل ممتاز وطلع معان شرايف و بونجز وابو لولو

و شوية ونقلنا وطلع معانا شوية كوشر زي العسل

و الراجل بصراحة اول ما يلاقي الدور منع بينقل من نفسه

و هو دا افضل احساس في الرحلة انك تلاقي الريس بينقل من نفسة أو أول ما تطلب منه

انا على دخول الليل كنت مليت نص الأيس ودي اول مره تحصل معايا من فتره

بدء الليل والهوا شد و الريس دور على كنه كانت على عمق 8 متر

بعد ما كن ورمى البروسي طلبنا منه انه ينقلنا الى كنه 20 متر أو اكثر

بصراحة الراجل بمنتهى رضا النفس نقلنا مكان تاني برغم ان الهوا شادد

و البحري حماده طلع استاذ ورئيس قسم جهز لكل واحد فينا لنسه و قال شيلوا مكن التسقيط

و بدء يقطع لنا سبيط شرائح طويل و نص ماكريل بيظبطه بالمقص بنفس حجم الكاليماري

و بدأنا الشغل و قعدنا شوية من غير اي شد أو اكل و حسينا اننا زهقنا

والرجل اكد اننا هنعمل احلى شغل من المكان دا

و بالفعل بدأت البراكودا تدخل علينا بس ايه مقصات يا جماعة

كل اللنسات اتقطعت وكله بدء يجهز الوايرات

و بدء حماده يطلع بركودا و كمان استاذ احمد صديقنا ورشاد طلع واحده

طلعنا حوالي 9 براكودا احجام من 2 الى 4 كيلو تقريباً

مع الساعة 2 كدا الدنيا ريحت

وفجاءة الساعة 3 ببص من غرفة النوم الاقي حمادة ( البحري ) بيتنطط على الطبان ويجري شمال ويمين بشكل هستيري

وواقف معاه صديقنا احمد وبيشد اللنسة وهيوقع في المياه وبيزعق وعايز الوجنة

طلعت جري على بره الاقي الحاج مطلع دراك وزن 20 كيلو

حاجة ما شاء الله تفرح بجد بس طلوعها من المياه حاجة مش سهله

المهم تاني يوم الصبح الهوا شد جامد بس الريس نقل بينا كتير

كلنا اصطدنا واستمتعنا مع عم محمود ومع البحري حماده

و مركب لينا خيبت ظننا وطلعة جباااارة ورزقها واسع ما شاء الله

اسيبكم مع الصور ( صور السمك في البيت وليست على المركب )

المصدر: منتدى صيادين مصر