المساعد الشخصي الرقمي

مشاهدة النسخة كاملة : خبرتي محدوده في الصيد البحري ومعايا 8 افراد وعايز اطلع رحلة تسقيط في السخنة (ساعدوني)


بموت في الصيد
08-06-2012, 06:49 AM
السلام عليكم ورحمه الله وبركاتة

بصراحة انا تاية ومحتاج مساعده من الناس الطيبة اللى هنا (وحيات اغلى حاجة عندكو تساعدوني :) )

عايز اطلع رحلة تسقيط في العين السخنة بعد العيد على يوم الخميس او الجمعة
معايا عدد 8 افراد

1- عايز مركب كويسة وسعرها كويس تسيع عدد من 8 ل 10 افراد (ويا ريت تكون طلعت عليها قبل كدا)
2- انا والجروب اللى معايا عايزين نطلع بالليل عشان الشمس والحر من 6 العصر ل 6 الصبح (هل صيد الليل ولا النهار احسن) ؟
3- الطعم : المتاح عندي السبيط المجمد بجيبو وامَلّحة واحضره للصيد وكذا مره بصطاد بية من الشاطي بيقى زي الفل (هل هينفع لوحده)
4- المعدات .. السنانير اللى معانا للصيد العذب وضعيفة مش هتستحمل البحر الاحمر .. نسقط ببكر خيط والدنيا هتبقى تمام

هل: الوقت دا موسم صيد ولا الصيد هيبقى واقع والناس مش هتتبسط (انتو عارفين اللى بينظم هو اللى بيبقى في وشة كل حاجه .. لو واحد جالة شوية اسهال بيكون اللى منظم الرحلة هو السبب :) )

بخصوص مارينا وادي الدوم .. هل فعلا اداره المارينا لازم تاخد اسماء الاشخاص اللى طلعو على المركب عشان الامان وكدا (عايز اطمن عليا وعلى الناس اللى معايا :) )

كنت اتمنى ان اول مشاركة ليا افيد بيها الناس :) .. بسسس انا اسف جدا للتطويل واتمنى تساعدوني

و كل سنة وانتو طيبين

بموت في الصيد
08-06-2012, 09:14 PM
يا جدعان اللى عارف اي معلومة ميبخلش علينا معلومه من ها ومعلومة من هنا هنجمع في الأخر

محمد كمال المحامي
08-06-2012, 10:57 PM
اهلا بيك في المنتدى

انا كان نفسي اساعدك في موضوع المركب

لكن اللي هيقدر يساعدك هو الحاج محمد ( bodygard 34 (http://www.misrhunting.trakhes.com/member.php?u=196) )

بخصوص الطعم وعن تجربة افضل طعم لهذه المنطقة هو الجمبري الصغير

و لو انت من القاهرة هتجيبة من عند محل الجبلاوي بس هاتوا من الي بسعر 35 جنية للكيلو

ودا هتلاقيه على الطريق الدائري قبل كارفور المعادي بشوية بسيطة

بتتفق معاه على الجمبري وبيحضره لحضرتك وانت رايح على الرحلة حسب الميعاد المتفق عليه

و كمان هتلاقي الصيد بالسمك الماكريل ممتاز

و بخصوص عدة الصيد هتلاقي متعة كبيرة في الصيد على ايدك بالبكرة يعني

ومش لازم مكن ولا حاجة

دا تليفون الجبلاوي :
اسم الشركة: الجبلاوى لادوات صيد الاسماك العنوان: 48 ش 77
المعادى, القاهرة
معالم الطريق: بجوار رئاسة حى المعادى وطرة
التليفون: 0100-1450558
بس دا عنوان فرع المعادي اما عنوان الدائري فزي ما قولت لك على الدائري

ربنا يوفقك و تتمتع بالصيد انت واصحابك

اه بخصوص مارينا وادي الدوم لازم طبعاً صور البطاقات قبل ما تروحوا لعمل تصريح

بموت في الصيد
08-07-2012, 01:42 AM
اهلا بيك في المنتدى

انا كان نفسي اساعدك في موضوع المركب
لكن اللي هيقدر يساعدك هو الحاج محمد ( bodygard 34 (http://www.misrhunting.trakhes.com/member.php?u=196) )

بخصوص الطعم وعن تجربة افضل طعم لهذه المنطقة هو الجمبري الصغير
و لو انت من القاهرة هتجيبة من عند محل الجبلاوي بس هاتوا من الي بسعر 35 جنية للكيلو
ودا هتلاقيه على الطريق الدائري قبل كارفور المعادي بشوية بسيطة
بتتفق معاه على الجمبري وبيحضره لحضرتك وانت رايح على الرحلة حسب الميعاد المتفق عليه
و كمان هتلاقي الصيد بالسمك الماكريل ممتاز
و بخصوص عدة الصيد هتلاقي متعة كبيرة في الصيد على ايدك بالبكرة يعني
ومش لازم مكن ولا حاجة

دا تليفون الجبلاوي :
اسم الشركة: الجبلاوى لادوات صيد الاسماك العنوان: 48 ش 77
المعادى, القاهرة
معالم الطريق: بجوار رئاسة حى المعادى وطرة
التليفون: 0100-1450558
بس دا عنوان فرع المعادي اما عنوان الدائري فزي ما قولت لك على الدائري

ربنا يوفقك و تتمتع بالصيد انت واصحابك
اه بخصوص مارينا وادي الدوم لازم طبعاً صور البطاقات قبل ما تروحوا لعمل تصريح



تسلم يا ادمين على الرد والاهتمام .. بجد والله الف الف الف شكر
بس انا اسف لو ممكن اسألك تاني في نقطة

الصيد بالليل هيكون كويس ولا بالنهار احسن ( عايزين نهرب من الحر بتاع الصبح+اني سمعت ان بالليل احجام كبيره وبتاع)

وبخصوص المركب ممكن اكلم المارينا على طوول .. وفي مركب اسمها ايات ممكن لو اتزنقت اكلم الريس بتاعها ( بس كان هدفي ان حضراكم تكونو طلعتو ف مركب معينة والطاقم بتاعها ناس محترمين) وهسأل بردو العضو المحترم اللى اديتني بروفايلة

وبالنسبة للتصريح .. بناخد صور البطاقات وهناك بيعملولنا التصريح وبنطلع على المركب ولا لازم اروح اعملة قبلها بيوم

ان اسف مره تانية للتطويل بس زي ما انت شايف انا ابيض :) :)

محمد كمال المحامي
08-07-2012, 01:59 AM
افضل وقت للصيد من بعد العصر حتى الفجر

انا طلعت من مارينا على مركب اسمها البرنسيسة اسراء

و كان عليها ريس اسمه شعبان

راجل في منتهى الأدب و عارف اماكن الصيد وكمان بيتحرك بالليل عكس معظم الريسين

لكن اعمل حسابك ان معظم الأيام الهوا بيشد بالليل

ولو حصل معاك كدا يبقى مش هتصطاد الا اول الليل بس

وبعد كدا الريس هيكن في حتة بسبب الهوا

بالنسبة لصور البطاقات انت ممكن تبعتها لصاحب المركب بالإيميل

أو هتضطر تنزل للريس قبل الطلعة بيومين

وحاول تشوف مواقع الارصاد قبل الطلعة بيومين

بموت في الصيد
08-07-2012, 03:43 AM
افضل وقت للصيد من بعد العصر حتى الفجر

انا طلعت من مارينا على مركب اسمها البرنسيسة اسراء
و كان عليها ريس اسمه شعبان
راجل في منتهى الأدب و عارف اماكن الصيد وكمان بيتحرك بالليل عكس معظم الريسين
لكن اعمل حسابك ان معظم الأيام الهوا بيشد بالليل
ولو حصل معاك كدا يبقى مش هتصطاد الا اول الليل بس
وبعد كدا الريس هيكن في حتة بسبب الهوا
بالنسبة لصور البطاقات انت ممكن تبعتها لصاحب المركب بالإيميل
أو هتضطر تنزل للريس قبل الطلعة بيومين
وحاول تشوف مواقع الارصاد قبل الطلعة بيومين




تمام قوي .. متشكر مره تانية على الرد والأهتمام
انا بعت للعضو المحترم استفسر منة على الموضوع .. يا رب يشوف رسالتي ويقولي رأية
وفي واحد اعرفة
قالي كلم محلات هامور .. وخليهم يحجزولك مركب .. قالي ل 8 افراد هتبقى بحوالي من 900 جنية ل 1500 جنية .. وبصراحة خايف اكلمهم واتفق يلبسوني في الحيط :)

محمد كمال المحامي
08-07-2012, 04:11 PM
انا مليش تجربة مع هامور قبل كدا

و الحاج محمد مشرف قسم صيد الاسماك هيفيدك ان شاء الله

bodygard 34
08-11-2012, 12:53 AM
بص ياسيدى..هامور فى الغالب بيتعامل مع حياة وجنات والمركبين دول تقريبا توأم بس انا ركبت حياة اكترمن مره والريس بتاعها دمه خفيف ويحب الملاغيه يبقى معاك زى الفل واسمه خالد اش اش ونمرته 01222532618 ومعاه 2 بحريه كويسين..اما جنات كان عليها واد ريس زى الفل اسمه محمد سالم بس سمعت انه سابها وجاب مركب صيد صغير (فلوكه )بيسترزق منها ..البرنسيسه اسراء عليها الر يس شعبان راجل كبير وهادى ويحب الامان وفى ميزه انه طوع ومعاه بحريه راجل عجوز بس خبير اسمه حسين وهو اللى شايل المركب ومهم جدا ارضاؤه..وكمان هو طباخ بريمو ومابيهمدش..صاحب المركب دى اسمه الحاج شوكت من السويس وتليفونه 0183693071 البرنسيسه هنا كانت من سنه من افخم مراكب وادى الدوم بس ماطلعتش عليها من فتره ماعرفش حالها ايه دلوقت ومين اللى عليها لكن صاحبها من القاهره واسمه طارق وتليفونه 01223956042 بصراحه الذاكره دلوقت مش سعفانى لكن انا طلعت على اكتر من 7 او8 مراكب من المارينا دى..موضوع الصيد بالليل او النهار ده معتمد انت حاتروح فين؟؟؟لو حاتنزل تحت الزعفرانه او ابو الدرك او الرشقه(ماتروحش ابعد من كده عشان ماتضيعش الوقت فى المشى)حايبقى الشغل من 6 صباحا لحد 12 ظهرا وفى الغالب الشغل مش حايخرج عن الكوشر والحريد وحبيبة الصيادين( ابو لولو) واخونا الادمين عارف يعنى ايه ابو لولو(اصغر سمكه فى البحر الاحمر) وبعد كده من العصر ممكن يخش عليك شعور كيلوات او بونجز ولو حظك وحش حايخش قراد ولو دخل مش حتاخد غيره وانصحك ترميه لأنه جلده وكبده سام وعاوز خبير عشان ينضفه...وبعدين لما الدنيا تتضلم اكيد حايكن فى كنه امان بس تكون فوق شعب عشان تتسلوا بشويه دنيس حفار كفافى او ابو نقطه..الاحجام الكبيره صعب تلاقيها دلوقت هناك بعد الانتشار العمرانى وبالذات بعد تشغيل ميناء السخنه كل ده طفش لتحت بعد غارب وبالتحديد فى منطقة العشوش او كما يسميها البعض راس العش(غير راس العش اللى فى سيناء)...اما لو اتجهت شرقا وبالتحديد على بعد 10 كيلو تقريبا من راس سدر ففى منطقه هناك لو عرف الريس يجيبها صح (جنب الشمندوره التانيه دى مليانه خير من مرجان ابو قتب لكوشر لخرمان عايم (الخرمان لو دخل عليكوا مش حتلاحقوا)بس عيبها انها ملقف هوا جامد ولازم بدى بدرى تكنوا جنب الشط يعنى بالليل مافيش شغل وتحتك صحراء..كفايه عليكوا كده انتوا اكيد زهقتوا

bodygard 34
08-11-2012, 01:00 AM
بخصوص التصاريح ..مش محتاج تروح قبلها بيوم ولا تيعت فاكس ..انت بس تنبه على كل واحد يجيب بطاقة الرقم القومى معاه التصريح بيتعمل على المركب ..حايجيلكوا لحد عندكوا عسكرى حرس حدود حايلم البطايق ويسجلكوا فى دفتر وخلاص

Compact
08-11-2012, 01:20 AM
الله ينور على الخبرة البحرية الغير عادية :)

bodygard 34
08-11-2012, 01:43 AM
الله ينور على الخبرة البحرية الغير عادية :)
سيع صنايع والبخت ضايع يا كبيرنا..الحمد لله على كل حال

Compact
08-11-2012, 01:53 AM
سيع صنايع والبخت ضايع يا كبيرنا..الحمد لله على كل حال

متبخلش علينا بالمعلومات الحلوة اللى متتعوضش دى يا حاج\ محمد

و ياريت تعمل مواضيع خاصة عن الصيد البحرى يا شيخ صيادين مصر البحرى :)

bodygard 34
08-11-2012, 02:09 AM
متبخلش علينا بالمعلومات الحلوة اللى متتعوضش دى يا حاج\ محمد

و ياريت تعمل مواضيع خاصة عن الصيد البحرى يا شيخ صيادين مصر البحرى :)
على فكره ياجنرال انا من اقل هواة الصيد حظا فى جمهورية مصر العربيه وتقدر تسأل الادمين(ا/محمد كمال ) انا بس مافيش طلعه اطلعها الا لازم اكتسب منها خبره سواء بتجربه شخصيه او من الزملاء على المركب او من الريس بتاع المركب او حتى من البحريه اللى بيشتغلوا على المركب وبفضل الله ماتنمحيش من دماغى.. والعجيب انى مابعرفش اعوم ..يعنى لا يمكن انى اكون شيخ صيادين فى يوم من الايام

Compact
08-11-2012, 02:13 AM
على فكره ياجنرال انا من اقل هواة الصيد حظا فى جمهورية مصر العربيه وتقدر تسأل الادمين(ا/محمد كمال ) انا بس مافيش طلعه اطلعها الا لازم اكتسب منها خبره سواء بتجربه شخصيه او من الزملاء على المركب او من الريس بتاع المركب او حتى من البحريه اللى بيشتغلوا على المركب وبفضل الله ماتنمحيش من دماغى.. والعجيب انى مابعرفش اعوم ..يعنى لا يمكن انى اكون شيخ صيادين فى يوم من الايام

فى ناس كانوا فى الضفادع البشرية و معندهمش ربع خبرتك فى الصيد

الخبرة بتاعتك و الرزق بتاع ربنا :)

يا شيخ صيادين مصر :)

bodygard 34
08-11-2012, 02:16 AM
فى ناس كانوا فى الضفادع البشرية و معندهمش ربع خبرتك فى الصيد

الخبرة بتاعتك و الرزق بتاع ربنا :)

يا شيخ صيادين مصر :)
اه يارافع روحى المعنويه يا جنرال..كل سنه وانت طيب وتصبح على خير ..اقوم اعمل السحور للولاد

Compact
08-11-2012, 02:23 AM
اه يارافع روحى المعنويه يا جنرال..كل سنه وانت طيب وتصبح على خير ..اقوم اعمل السحور للولاد

ربنا يخليهوملك و بالهنا و الشفا :)

bodygard 34
08-12-2012, 11:41 PM
هو انا اتأخرت على صاحب الموضوع فى الرد لدرجة انه زعل وطفش؟؟؟؟؟

Compact
08-14-2012, 03:41 PM
هو انا اتأخرت على صاحب الموضوع فى الرد لدرجة انه زعل وطفش؟؟؟؟؟
ممكن يكون فى وسط البحر دلوقتى :)

بموت في الصيد
04-11-2013, 01:06 AM
بص ياسيدى..هامور فى الغالب بيتعامل مع حياة وجنات والمركبين دول تقريبا توأم بس انا ركبت حياة اكترمن مره والريس بتاعها دمه خفيف ويحب الملاغيه يبقى معاك زى الفل واسمه خالد اش اش ونمرته 01222532618 ومعاه 2 بحريه كويسين..اما جنات كان عليها واد ريس زى الفل اسمه محمد سالم بس سمعت انه سابها وجاب مركب صيد صغير (فلوكه )بيسترزق منها ..البرنسيسه اسراء عليها الر يس شعبان راجل كبير وهادى ويحب الامان وفى ميزه انه طوع ومعاه بحريه راجل عجوز بس خبير اسمه حسين وهو اللى شايل المركب ومهم جدا ارضاؤه..وكمان هو طباخ بريمو ومابيهمدش..صاحب المركب دى اسمه الحاج شوكت من السويس وتليفونه 0183693071 البرنسيسه هنا كانت من سنه من افخم مراكب وادى الدوم بس ماطلعتش عليها من فتره ماعرفش حالها ايه دلوقت ومين اللى عليها لكن صاحبها من القاهره واسمه طارق وتليفونه 01223956042 بصراحه الذاكره دلوقت مش سعفانى لكن انا طلعت على اكتر من 7 او8 مراكب من المارينا دى..موضوع الصيد بالليل او النهار ده معتمد انت حاتروح فين؟؟؟لو حاتنزل تحت الزعفرانه او ابو الدرك او الرشقه(ماتروحش ابعد من كده عشان ماتضيعش الوقت فى المشى)حايبقى الشغل من 6 صباحا لحد 12 ظهرا وفى الغالب الشغل مش حايخرج عن الكوشر والحريد وحبيبة الصيادين( ابو لولو) واخونا الادمين عارف يعنى ايه ابو لولو(اصغر سمكه فى البحر الاحمر) وبعد كده من العصر ممكن يخش عليك شعور كيلوات او بونجز ولو حظك وحش حايخش قراد ولو دخل مش حتاخد غيره وانصحك ترميه لأنه جلده وكبده سام وعاوز خبير عشان ينضفه...وبعدين لما الدنيا تتضلم اكيد حايكن فى كنه امان بس تكون فوق شعب عشان تتسلوا بشويه دنيس حفار كفافى او ابو نقطه..الاحجام الكبيره صعب تلاقيها دلوقت هناك بعد الانتشار العمرانى وبالذات بعد تشغيل ميناء السخنه كل ده طفش لتحت بعد غارب وبالتحديد فى منطقة العشوش او كما يسميها البعض راس العش(غير راس العش اللى فى سيناء)...اما لو اتجهت شرقا وبالتحديد على بعد 10 كيلو تقريبا من راس سدر ففى منطقه هناك لو عرف الريس يجيبها صح (جنب الشمندوره التانيه دى مليانه خير من مرجان ابو قتب لكوشر لخرمان عايم (الخرمان لو دخل عليكوا مش حتلاحقوا)بس عيبها انها ملقف هوا جامد ولازم بدى بدرى تكنوا جنب الشط يعنى بالليل مافيش شغل وتحتك صحراء..كفايه عليكوا كده انتوا اكيد زهقتوا

بخصوص التصاريح ..مش محتاج تروح قبلها بيوم ولا تيعت فاكس ..انت بس تنبه على كل واحد يجيب بطاقة الرقم القومى معاه التصريح بيتعمل على المركب ..حايجيلكوا لحد عندكوا عسكرى حرس حدود حايلم البطايق ويسجلكوا فى دفتر وخلاص

هو انا اتأخرت على صاحب الموضوع فى الرد لدرجة انه زعل وطفش؟؟؟؟؟

اعتقد اني اكتر رد متأخر على تاريخ المنتديات :) ههههه

الف الف الف مليون شكر على مساعدتك ليا .. وانا اسف والله المنتدى تاه مني ومعرفتش اكمل متابعة الموضوع

طلعت الرحلة السنة اللي فاتت من العين السخنة من مارينا وادي الدوم على يخت حياه مع الريس خالد
البحر كان شادد يومها ومقدرناس ندخل جوا (مكان اسمة المراوح) على بعد ساعتين من مارينا وادي الدوم
ودخلنا مسافة حوالي كيلو جوا البحر والريس خالد يعرف بعض اماكن الشعاب كان بيقف عليها والشعاب بتكون على عمق من 18 ل 30 متر

بس الصيد الصراحة مكنش قد كده بالمره ..
بعد محاولات وبعد ما زهقنا

قلعنا تشيرتاتنا ونطينا في البحر وقضينا اليوم ما بين لعب في البحر ومحاولة لأصطياد اي حاجة
تقريبا احنا الجروب كلنا مصطدناش اكتر من كيلو سمك هههههههههههه
والغريب ان كان بيطلع معانا سمك صغير خالص قد الصباع .. مش عارف يعني احنا هاربنين من الشط من الاحجام الصغيره دي نلاقيها جوا كمان

بس كان يوم لذيذ وريس مركب وبحاره محترمين

قالولي بعد كدا ان البحر الاحمر كل ما اتجهت جنوبا كل ما احجام الصيد اختلفت :)